Таленты ад роднай зямлi

Пошук персаналiй		Геаграфiчны пошук


Імя на беларускай мове:		Ермалаеў Уладзімір Фаміч
Гады жыцця, месца нараджэння:		(27.12.1933, у вёсцы Галавачы Дрыбінскага (зараз Горацкага раёна) Магілёўскай вобласці – 12.12.2014).
Творчая накіраванасць, тэматычны жанр:		Сатырык, гумарыст.
Звесткі аб званнях, узнагародах:

Дадатковая інфармацыя (націсніце для паказу/скрывання)

Імя на рускай мове:		Ермолаев Владимир Фомич
Псеўданімы:
Творчасць:		Ермалаеў Уладзімір Фаміч – сатырык, гумарыст і вучоны-гісторык. Нарадзіўся будучы паэт 2 студзеня 1933 г. у вёсцы Галавачы Дрыбінскага (зараз Горацкага раёна) Магілёўскай вобласці ў сям’і настаўніка і калгасніцы. Дзяцінства і юнацкія гады прайшлі ў вёсцы Пятухоўка Чаускага раёна. У пачатку Вялікай Айчыннай вайны сям’я Ермалаевых пераехала ў вёску Залессе Мсціслаўскага раёна Магілёўскай вобласці, на радзіму маці. Бацька паэта Фама Васільевіч быў настаўнікам, працаваў загадчыкам пачатковай школы і разам з аднавяскоўцамі быў мабілізаваны на барацьбу з фашыстамі. На фронце ваяваў у чыне малодшага лейтэнанта, кіраваў стралковым узводам, быў паранены і кантужаны. Загінуў 19 кастрычніка 1944 г. у жорсткім баю на польскай зямлі. Пасля заканчэння сямігодкі паступіў у Мсціслаўскае педвучылішча, якое закончыў у 1953 г. Студэнтам пачаў спрабаваць сілы ў мастацкай творчасці. Першыя вершы 18-ці гадовы юнак змясціў на старонках мсціслаўскай раёнкі з тагачаснай назвай "Калгасная газета". Пасля была вучоба ў Мінскім педінстытуце імя М. Горкага. Працу пачынаў у Смаргоні інспектарам райана, працаваў настаўнікам, сакратаром райкома камсамола. Друкаваў вершы ў раённай газеце, у "Чырвонай змене". З 1963 г. працуе ў Мінску ў ЦК ЛКСМБ, у Міністэрстве вышэйшай і сярэдняй адукацыі. З 1968 г. выкладае гісторыю ў ВНУ сталіцы, у тым ліку інстытуце замежных моў, у політэхнічным інстытуце. Абараніў кандыдацкую дысертацыю. У. Ермалаеў напісаў шэраг навуковых прац гістарычнага плана, у якіх галоўную ўвагу звяртаў на развіцце беларускай навукі і ўмацаванне яе сувязі з вытворчасцю. Больш дваццаці гадоў выступаў лектарам таварыства "Веды", быў старшынёй секцыі лектараў-міжнароднікаў. Методыцы падрыхтоўкі лекцый прысвяціў некалькі брашур і надрукаваў шэраг артыкулаў у зборніках і перыядычных выданнях. Большасць яго сатырычных і гумарыстычных твораў звязана з падзеямі пастперабудовачнага часу, з рэаліямі сенняшняга дня: абвальныя працэсы ва ўсім, разгул беззаконня, бязмежны рост цэн, абагачэння вярхоў, рост кучкі багацеяў, згалення мас. У сатырычных творах У. Ермалаева нярэдка праглядваюцца канкрэтныя сітуацыі з нашага жыцця. Сам сын вёскі сатырык добра ведае драматычнае становішча сельскай гаспадаркі. Трывогай і болем прасякнуты яго вершы "Пустое месца", "З трывогай да Бога", "Цана абутку" і іншыя. У апошнія гады Ермалаеў паспяхова асвоіў складаны жанр літаратурнай пародыі. Цікавая пародыі на Л. Галубовіча, К. Камейшу і інш. Выдаў тры зборнікі гумару і сатыры. У 1999 г. прыняты ў Саюз пісьменнікаў.
Спіс асобна выдадзеных кніг і зборнікаў:		"Хто не смяецца, той не есць!" (1994) "Пераход колькасці ў колкасці" (1997) "Радком па кумпалу" (Мінск, 1998) "Дулі будуць апасля: гумарыстычныя, сатырычныя вершы, літаратурныя пародыі" (Мінск, 2004) "Смехам закаханыя" (Баранавічы, 2008)
Звесткі пра публікацыі ў зборніках, перыядычных выданнях:		Аўтар літаратурна-крытычных артыкулаў
Крыніцы інфармацыі:		Анцух, Л. Ермалаеў Уладзімір Фаміч : [звесткі аб жыцці і творчасці паэта з Дрыбінскага раёна] / Ліліяна Анцух // Ермалаеў, У. Смех у мех, а сум у торбу : лірыка, гумар, сатыра, пародыі / Уладзімір Ермалаеў. - Мінск, 2015. — С. 140. Анцух, Л. Замест некралога, або нататкі выдаўца : [пра творчасць Уладзіміра Фаміча Ермалаева, паэта з Дрыбінскага раёна] / Ліліяна Анцух // Ермалаеў, У. Смех у мех, а сум у торбу : лірыка, гумар, сатыра, пародыі / Уладзімір Ермалаеў. - Мінск, 2015. — С. 141—142. Анцух, Л. Наш дарагі аўтар : [пра кнігу "Смех у мех, а сум у торбу" паэта Уладзіміра Ермалаева, ураджэнца вёскі Галавічы Дрыбінскага раёна] / Ліліяна Анцух // Літаратура і мастацтва. - 2015. — 6 лютага. — С. 12. Гісторыя з гумарам : [пра Уладзіміра Фаміча Ермалаева, паэта, ураджэнца в. Галавічы Дрыбінскага раёна] // Вожык. - 2018. — № 1. — С. 16 : іл. Зэкаў, А. Развітальнае : [верш памяці паэта Уладзіміра Ермалаева, ураджэнца вёскі Галавічы Дрыбінскага раёна] / Анатоль Зэкаў // Літаратура і мастацтва. - 2014. — 19 снежня. — С. 3. Ларчанка, У. Жыў, каб помнілі : [звесткі аб жыцці і творчасці Уладзіміра Фаміча Ермалаева, паэта з Дрыбінскага раёна] / У. Ларчанка, А. Арбузаў // Святло Кастрычніка (Мсціслаў). - 2016. — 31 жніўня. — С. 5 : фота. Ларченко, В. Он оставил свой смех : [про книгу поэта Владимира Ермолаева "Смех у мех, а сум у торбу", уроженца д. Головичи Дрибинского района] / Владимир Ларченко // Святло Кастрычніка (Мсціслаў). - 2015. — 10 чэрвеня. — С. 5. Малец, Я. Бывай... : [верш памяці паэта Уладзіміра Ермалаева, ураджэнца вёскі Галавічы Дрыбінскага раёна] / Янусь Малец // Літаратура і мастацтва. - 2014. — 19 снежня. — С. 3. Памяці калегі і таварыша : [некралог паэту Уладзіміру Фамічу Ермалаеву, ураджэнцу вёскі Галавічы Дрыбінскага раёна] // Літаратура і мастацтва. - 2014. — 19 снежня. — С. 3. Памяці Уладзіміра Ермалаева : [некралог паэту, ураджэнцу вёскі Галавічы Дрыбінскага раёна] // Святло кастрычніка (Мсціслаў). - 2014. — 20 снежня. — С. 2.