Таленты ад роднай зямлi

Пошук персаналiй		Геаграфiчны пошук


Імя на беларускай мове:		Тварановіч Галіна Паўлаўна
Гады жыцця, месца нараджэння:		(17.02.1955, в. Дараганава, Асіповіцкі раён, Магілёўская вобласць).
Творчая накіраванасць, тэматычны жанр:		Паэтэса, літаратуразнаўца.
Звесткі аб званнях, узнагародах:		Доктар філалагічных навук (1999).

Дадатковая інфармацыя (націсніце для паказу/скрывання)

Імя на рускай мове:		Творонович Галина Павловна
Псеўданімы:
Творчасць:		Галіна Паўлаўна Тварановіч, прафесар, выклачыца беларускай літаратуры ў Беластоцкім універсітэце, аўтар манаграфій і літаратурных выданняў, нарадзілася на Магілёўшчыне. Скончыла філалагічны факультэт БДУ (1977). Яе кіраўніком у аспірантуры быў Алесь Адамовіч. У 1985 г. Тварановіч абараніла кандыдацкую дысертацыю, а ў 1999 г. — доктарскую. З 1983 г. працавала навуковым супрацоўнікам у інстытуце літаратуры Нацыянальнай Акадэміі Навук Беларусі. З 1999 г. выкладае ва ўніверсітэце ў Беластоку (Польшча). З 2001 г. – галоўны рэдактар часопіса "Studia wschodniosłowiańskie" ("Усходнеславянскія даследаванні"). Друкуецца з 1967 г., як літаратуразнаўца – з 1982 г. Аўтар даследаванняў па ўзаемасувязях сучаснай беларускай прозы і прозы былой Югаславіі, па кампаратывістыцы, гісторыі беларускай літаратуры, сучасным літаратурным працэсе: "Маральны свет героя: Беларуская і югаслаўская ваенная проза 60–70-х гг.", "Пакутаю здабыты мір: Тыпалогія характару ў беларускай і славенскай прозе" і інш. Адзін з аўтараў "Гісторыі беларускай літаратуры ХХ ст." (Т. 1–4, 1999–2002). Яе паэтычныя зборнікі "Ускраек тысячагоддзя", "Чацвёртая стража" прасякнуты роздумам над праблемамі жыцця, лёсам чалавека ў Вечнасці, любоўю да роднай зямлі, хрысціянскімі матывамі. Перакладае з сербскай і польскай моў. Адрасаваныя сапраўдным гурманам ад лірыкі – людзям з душой вытанчанай і ўзнёслай. Асобная падборка – "Сербскія матывы". Вершы зборніка прымушаюць кожнага, хто дакранецца да іх душой, задумацца аб існаванні сусвету і сваім месцы ў ім. Адчуванне радзімы дзяцінства, шчымлівай замілаванасці да найдаражэйшага кутка ў сусвеце, хаты з бярвенцаў, грудзей зямелькі, усяго навакольнага прыроднага космасу характэрна для гэтай паэткі. Роднасць са сваёй зямлёй, са сваім словам "настоена" ў яе на верасах з роднага Дараганава. Яе паэзія, яе слова жывяцца і жывуць спадчынна-дарагімі рэаліямі: ракою Пціч з яе дубамі; зорамі "над жніўным Дараганавам"; чарніцамі "з ягаднікаў маленства", верасам. Дастаткова прачытаць верш "Цеханавецкі збанок", каб зразумець, што верасы — гэта сімвал радзімы, дарагі і святы для паэткі. Яе вершы, як і яна сама – светлыя, узнёслыя, лёгкія і глыбокія, але глыбокія такой яснай, чыстай глыбінёй.
Спіс асобна выдадзеных кніг і зборнікаў:		"Нравственный мир героя" (Мінск, 1986) "Пакутаю здабыты мір" (Мінск, 1991) "Беларуская літаратура. Паўднёваславянскі кантэкст" (Мінск, 1996) "Ускраек тысячагоддзя" (Мінск, 1996) "Верасы Дараганава" (Мінск, 2000) "Чацвёртая стража" (Беласток, 2004) "Пад небам Айчыны" (Беласток, 2005)
Звесткі пра публікацыі ў зборніках, перыядычных выданнях:		Аўтар літаратурна-крытычных артыкулаў
Крыніцы інфармацыі:		Галіна Паўлаўна Тварановіч // Беларускія пісьменнікі : біябібліяграфічны слоўнік. У 6 т. / пад рэд. А. І. Мальдзіса. – Мінск : БелЭн. – 1992-1995. Творонович Галина Павловна // Республика Беларусь : энциклопедия : в 6 т. / ред. Г. П. Пашков. – Минск, 2008. – Т. 7. – С. 190. Мальдзіс, А. Вернасць Беларусі, Польшчы і Сербіі / Адам Мальдзіс // ЛіМ. – 2008. – 27 чэрвеня. – С. 15.