Таленты ад роднай зямлi

Пошук персаналiй		Геаграфiчны пошук


Імя на беларускай мове:		Паўлікава-Хейдарава Людміла Фёдараўна
Гады жыцця, месца нараджэння:		(11.02.1952, р.п. Ялізава, Асіповіцкі раён, Магілёўская вобласць).
Творчая накіраванасць, тэматычны жанр:		Паэтэса, пісьменніца.
Звесткі аб званнях, узнагародах:		Лаўрэат Лiтаратурнай прэмii iмя Алеся Адамовiча (1996). Прэмія 1980 г. за падборку вершаў у часопісе "Маладосць".

Дадатковая інфармацыя (націсніце для паказу/скрывання)

Імя на рускай мове:		Павликова-Хейдорова Людмила Федоровна
Псеўданімы:		Людмiла Паўлiкава, Людмiла Паўлiкава-Хейдарава
Творчасць:		Беларуская паэтэса Людміла Паўлікава-Хейдарава нарадзілася на Асіповіччыне, закончыла Ялізаўскую СШ і паступіла ў БДУ на факультэт прыкладной матэматыкі. Працавала старшым інжынерам навукова-даследчага інстытута электронна-вылічальных машын у Мінску, вядучым канструктарам Беларускага навукова-даследчага інстытута арганізацыі і кіравання будаўніцтвам пры Дзяржбудзе БССР, вядучым інжынерам Мінскага навукова-даследчага праектнага інстытута. З 1988 г. – рэдактар, з 1991 г. – намеснік галоўнага рэдактара творчага аб’яднання літаратурна-мастацкіх і пастановачных праграм Беларускага тэлебачання. Першая падборка вершаў Л. Паўлікавай з’явілася ў часопісе "Маладосць" у 1980 г., за якую ёй была прысуджана прэмія года. З таго часу яе вершы змяшчаюцца ў зборніку "Дзень паэзіі", часопісах "Полымя", "Вожык", "Работніца і сялянка", у рэспубліканскіх газетах. Аўтар кніг "Адведзіны рамонкавай паляны", "Тваё святло", "Купанне ў росах", драматычнай паэмы "Можна і нельга" (зборнік "І засталася каса ў пракосе"). У часопісе "Маладосць" друкаваліся і яе апавяданні. З 1989 г. выступае пад уласным прозвішчам Хейдарава і псеўданімам Людміла Паўлікава-Хейдарава – "Плач па анёлу", кніга апавяданняў "Дарт", фiласофская кніга "Вечаровае веча" (фрагменты ў часопісе "Маладосць" за 2009 г.). Пасля ўдзелу ў 8-м Усесаюзным з’ездзе маладых літаратараў СССР вершы Людмілы Хейдаравай ў перакладах на рускую мову можна знайсці ў друкаваных выданнях "Літаратурная газета", зборніку "Маладая гвардыя". У паэтычных творах выяўляюцца фiласофскi роздум, гiсторыка-патрыятычная i любоўная лiрыка, тэмы прыроды i вытокаў чалавечага духу. У празаічных творах аўтарскай пазiцыi ўласцiва дабрадушная iронiя. Пераклала з рускай на беларускую асобныя творы Г. Ахматавай, М. Валошына, М. Лермантава, Б. Пастэрнака, М. Цвятаевай, В. Мандэльштама, творы сучасных украінскіх паэтаў. Лаўрэат Лiтаратурнай прэмii iмя Алеся Адамовiча (1996) за прынцыповасць i майстэрства ў асвятленнi сучасных праблем Беларусi.
Спіс асобна выдадзеных кніг і зборнікаў:		"Адведзіны рамонкавай паляны" (Мінск, 1984) "Тваё святло" (Мінск, 1988) "Купанне ў росах" (Мінск, 1993) "Дарт" (Мінск, 2002) "Плач па анёлу" (Мінск, 2004)
Звесткі пра публікацыі ў зборніках, перыядычных выданнях:		Аўтар паэтычных і празаічных твораў у перыядычным друку
Крыніцы інфармацыі:		Родам з Асіповіччыны // Памяць. Асіповіцкі раён. – Мінск, 2002. – С. 630. Анталогія беларускай паэзіі. – Мінск, 1993. – С. 537-539. Хейдарава Людміла // Беларускія пісьменнікі (1917—1990) : даведнік /склад. А. К. Гардзіцкі ; нав. рэд. А. Л. Верабей. – Мінск : Мастацкая літаратура, 1994. – 653 с.: іл. Сакава, Н. Сімфонія жыцця Людмілы Хейдаравай-Паўлікавай : [бел. пісьменніцы, урадж. пас. Ялізава Асіпов. р-на] / Ніна Сакава // Краязнаўчая газета. – 2009. – № 18 (май). – С. 7. Сімфонія жыцця Людмілы Хейдаравай-Паўлікавай : метадычныя рэкамендацыі з серыі "Зарунела літаратурная ніва на зямлі Асіповіцкай" па прапагандзе творчасці Людмілы Паўлікавай-Хейдаравай / Асіповіцкая бібліятэчная сетка, Аддзел бібліятэчнага маркетынгу ; [складальнік В. Л. Логвін ; мастак В. В. Прасаловіч ; адказны за выпуск А. Г. Хлус]. – Асіповічы :Асіповіцкая цэнтральная бібліятэка, 2013. – 28 с.