Таленты ад роднай зямлi

Пошук персаналiй		Геаграфiчны пошук


Імя на беларускай мове:		Коршунаў Аляксандр Фаміч
Гады жыцця, месца нараджэння:		(4.03.1924, в. Палішына, Горацкі раён, Магілёўская вобласць – 12.07.1991, Мінск, пахаваны на паўночных могілках).
Творчая накіраванасць, тэматычны жанр:		Літаратуразнаўца, гісторык старажытнай беларускай літаратуры, тэкстолаг.
Звесткі аб званнях, узнагародах:		Кандыдат філалагічных навук (1956), лаўрэат Дзяржаўнай прэміі БССР імя Я. Коласа (1980) за ўдзел у двухтомным даследаванні "Гісторыя беларускай дакастрычніцкай літаратуры" і "Гісторыя беларускай савецкай літаратуры". Узнагароджаны ордэнам Айчыннай вайны II ступені, медалём Францыска Скарыны (1991) і іншымі медалямі, Ганаровай граматай Прэзідыума Вярхоўнага Савета БССР (1968, 1981).

Дадатковая інфармацыя (націсніце для паказу/скрывання)

Імя на рускай мове:		Коршунов Александр Фомич
Псеўданімы:
Творчасць:		Коршунаў Аляксандр Фаміч – літаратуразнаўца, гісторык старажытнай беларускай літаратуры, тэкстолаг. Нарадзіўся ў вёсцы Палішына Горацкага раёна ў сялянскай сям’і. У верасні 1943 г. мабілізаваны ў Чырвоную Армію. Удзельнічаў у баях за вызваленне Оршы і Віцебска. У адным з баёў быў цяжка паранены і дэмабілізаваны. Узнагароджаны ордэнам Айчыннай вайны 2-й ступені. Скончыў філалагічны факультэт Беларускага дзяржаўнага ўніверсітэта (1950), аспірантуру пры кафедры рускай літаратуры Ленінградскага дзяржаўнага ўніверсітэта і абараніў кандыдацкую дысертацыю (1956). Да выхаду на пенсію ў 1991 г. працаваў у Інстытуце літаратуры імя Я. Купалы АН БССР. Навуковая зацікаўленасць старажытнай беларускай літаратурай прывяла А.Ф. Коршунава да творчасці Ф. Скарыны, В. Цяпінскага, А. Каменскага і іншых славутых дзеячаў беларускай культуры, літаратуры і асветы. Друкавацца пачаў з 1955 г. Артыкулы змяшчаліся ў часопісах "Весці АН БССР", "Маладосць", "Полымя", "Нёман" і інш. У 1965 г. выйшла ў свет яго манаграфія "Афанасій Філіповіч. Жыццё і творчасць". Яна была прысвечана беларускаму публіцысту, царкоўнаму і грамадскаму дзеячу ХVІІ ст., таленавітаму пісьменніку старажытнай Беларусі. У 1969 г. ім быў складзены зборнік "Францыск Скарына. Прадмовы і пасляслоўі". Упершыню беларускі чытач змог пазнаёміцца з найбольш поўным зборам твораў усходнеславянскага першадрукара. Зборнік прадмоў і пасляслоўяў Ф. Скарыны стаў падмуркам для з’яўлення каштоўных даследаванняў па гісторыі літаратуры, культуры, філасофіі, педагагічнай думкі. Працягваючы гэту тэму, А. Ф. Коршунаў у 1990 г. склаў новы зборнік твораў Ф. Скарыны "Творы: прадмовы, сказанні, пасляслоўі, акафісты і пасхаліі". Вынікам даследчай дзейнасці па збору помнікаў старажытнай беларускай пісьменнасці і мемуарнай літаратуры сталі яго зборнікі "Помнікі старажытнай беларускай пісьменнасці" (1975), "Помнікі мемуарнай літаратуры Беларусі XVІ ст." (1983), "Иван Федоров и восточнославянское книгопечатание" (1984). А. Ф. Коршунаў – адзін з асноўных аўтараў падручніка для ВНУ "Гісторыя беларускай літаратуры. Старажытны перыяд" (1985), які вытрымаў ужо чатыры перавыданні і па якім ужо трэцяе дзесяцігоддзе вучацца студэнты-філолагі. А.Ф. Коршунаў актыўна ўдзельнічаў у стварэнні першых акадэмічных гісторый роднай літаратуры на беларускай і рускай мовах. У 1980 г. за ўдзел у напісанні двухтомнага даследавання "Гісторыя беларускай дакастрычніцкай літаратуры" і "Гісторыя беларускай савецкай літаратуры" (1977; на рускай мове) А. Ф. Коршунаў разам з суаўтарамі ўдастоены звання лаўрэата Дзяржаўнай прэміі БССР імя Якуба Коласа. У 1981 г. узнагароджаны Ганаровай граматай Вярхоўнага Савета БССР, у 1991 г. – медалём Францыска Скарыны. Пачатае А. Ф. Коршунавым атрымала далейшы працяг і развіццё, дало багаты плён, што пераканаўча сведчыць пра значнасць і вартасць зробленага даследчыкам.
Спіс асобна выдадзеных кніг і зборнікаў:		"Хрэстаматыя па старажытнай беларускай літаратуры" (Мінск, 1959) / склад. "Афанасій Філіповіч. Жыццё і творчасць" (Мінск, 1965) "Гісторыі беларускай дакастрычніцкай літаратуры" (Т. 1. Мінск, 1968) / у суаўт. "Францыск Скарына. Прадмовы і пасляслоўі" (Мінск, 1969) / склад. "Помнікі старажытнай беларускай пісьменнасці" (Мінск, 1975) / склад. "Традыцыі літаратуры старажытнай Русі ў беларускай літаратуры : дакастрычніцкі перыяд (Мінск, 1982) / у суаўт. "Помнікі мемуарнай літаратуры Беларусі XVІ ст." (Мінск, 1983) / склад. "Иван Федоров и восточнославянское книгопечатание" (Мінск, 1984) / склад. з інш. "Гісторыя беларускай літаратуры. Старажытны перыяд" (Мінск, 1985) / у суаўт. "Творы : прадмовы, сказанні, пасляслоўі, акафісты і пасхаліі" (Мінск, 1990) / склад.
Звесткі пра публікацыі ў зборніках, перыядычных выданнях:		Аўтар літаратурна-крытычных артыкулаў
Крыніцы інфармацыі:		Беларуская энцыклапедыя : у 18 т. – Мінск, 1999. – Т. 8. – С. 425. Беларускія пісьменнікі : біябібліяграфічны слоўнік : у 6 т. – Мінск, 1994. – Т. 3. – С. 384. Белорусская ССР : краткая энциклопедия : в 5 т. – Минск, 1982. – Т. 5. – С. 323. Весці АН Беларусі. Серыя грамадскіх навук. – 1992. – № 3–4. – С. 96–105. Ленінскі шлях (Горкі). – 2000. – 20 мая. Ліўшыц, У. Раскопкі вакол горацкага Парнаса / У. Ліўшыц. – Горкі, 2001. – С. 179–183. Могилёвская правда. – 1997. – 21 января. – С. 3. Полымя. – 2009. – № 3. – С. 201–202. Республика Беларусь : энциклопедия : в 7 т. – Минск, 2007. – Т. 4. – С. 233. Роднае слова. – 2004. – № 3. – С. 24–26. Роднае слова. – 2009. – № 7. – С. 31–34. Шляхам гадоў : гісторыка-літаратурны зборнік – Мінск : Мастацкая літаратура, 1994. – С. 351. Энцыклапедыя гісторыі Беларусі : у 6 т. – Мінск, 1997. – Т. 4. – С. 241. Энцыклапедыя літаратуры і мастацтва Беларусі : у 5-ці т. – Мінск, 1986. – Т. 3. – С. 110.