Таленты ад роднай зямлi

Пошук персаналiй		Геаграфiчны пошук


Імя на беларускай мове:		Кавалёў Васіль Пятровіч (Каваль Васіль)
Гады жыцця, месца нараджэння:		(17.08.1907, в. Сава, Горацкі павет, Магілёўская губерня (цяпер Горацкі раён, Магілёўская вобласць – 29.10.1937, Мінск, НКУС).
Творчая накіраванасць, тэматычны жанр:		Пісьменнік.
Звесткі аб званнях, узнагародах:

Дадатковая інфармацыя (націсніце для паказу/скрывання)

Імя на рускай мове:		Ковалев Василий Петрович
Псеўданімы:		В.К.; В.К-ль; Каваль В.; Каваль Василь; Каваль Вас
Творчасць:		Каваль Васіль Пятровіч – беларускі пісьменнік. Нарадзіўся ў в. Сава Горацкага раёна. Скончыў Шышаўскую школу. У 1925 г. вучыўся на агульнаадукацыйных курсах пры Горацкай сельскагаспадарчай акадэміі, затым паступіў у Магілёўскі педтэхнікум, але з-за хваробы маці вымушаны быў вярнуцца дадому. У 1925 г. калі вучыўся ў педтэхнікуме, быў прыняты ў члены літаратурнага аб’яднання "Маладняк". Жывучы са снежня 1925 г. у роднай вёсцы, В. Каваль займаўся сельскагаспадарчай працай, працаваў у сельскім выканкаме. З 1926 г. прымаў удзел у працы Горацкай філіі Аршанскага "Маладняка" і пачаў друкавацца у часопісе "Аршанскі маладняк". Тут ён пазнаёміўся з М. Гарэцкім. Аб працы ў Горацкай філіі Аршанскага "Маладняка" ў 1926 г. успамінаў яе актыўны ўдзельнік Юрка Гаўрук у кнізе "Ступені адказнасці". Удзел у працы Горацкай філіі Аршанскага "Маладняка" адыграў вялікую ролю ў станаўленні В. Каваля як пісьменніка. Акрамя літаратурнай дзейнасці В. Каваль у 1926 г. актыўна займаўся зборам і запісам народных песень і казак у вёсцы Сава і навакольных вёсках. Гэтыя матэрыялы ён даслаў у камісію Інбелкульта. У ліпені 1926 г. ён вырашае прадоўжыць адукацыю ўжо на літаратурна-лінгвістычным аддзяленні педфакультэта БДУ, дзе вучыўся ў 1926-1927 і 1928-1929 гг. з невялікім перапынкам. У перыяд навучання ў БДУ В. Каваль актыўна займаўся літаратурнай працай. Яго творы можна было сустрэць у часопісах "Полымя", "Маладняк", газетах "Звязда", "Савецкая Беларусь", "Чырвоная змена" і інш. Выйшла і першая кніга пісьменніка "Як вясну гукалі" (1927). Крытыкі аднагалосна прызналі Васіля Каваля за новую выдатную сілу ў беларускай літаратуры паслякастрычніцкага перыяду. У 1928 г. выйшла і другая яго кніга "На загонах", якая таксама была прыхільна сустрэта крытыкамі. Галоўныя тэмы твораў – адвечны побыт і праца беларускай вёскі, паглыблены псіхалагізм, рэалістычнае адлюстраванне рэчаіснасці. Пасля другога расколу "Маладняка" (1928) ён быў абраны членам ЦБ арганізацыі і ўведзены ў рэдакцыйную групу часопіса "Маладняк", дзе застаўся пасля рэарганізацыі аб’яднання і ўтварэння БелАПП. У 1931 г. Васіля Каваля прызываюць на службу ў Чырвоную Армію. Службу праходзіў як ваенны журналіст у Смаленску ў рэдакцыі газеты "Красноармейская правда". У пачатку вясны 1933 г. В. Каваль зноў жыве ў Мінску. Шмат працуе ў розных жанрах. І застаючыся лірыкам, ён не цураецца элементаў псіхалагічнай прозы, больш увагі пачынае аддаваць сюжэту. Піша аповесці для дзяцей – "Санька-сігналіст" (1934) і "Следапыты" (1936). У 1936 г. рэпрэсіраваны і асуджаны да вышэйшай меры пакарання. Рэабілітаваны ў 1957 г.
Спіс асобна выдадзеных кніг і зборнікаў:		"Як вясну гукалі" (Мінск, 1927) "На загонах" (Мінск, 1928) "Крыніца" (Мінск, 1929) "Выбраныя творы" (Мінск, 1932) "Санька-сігналіст" (Мінск, 1936) "Выбранае" (Мінск, 1959) "Следапыты" (Мінск, 1961)
Звесткі пра публікацыі ў зборніках, перыядычных выданнях:		Аўтар літаратурных артыкулаў у перыядычным друку
Крыніцы інфармацыі:		Беларуская ССР : кароткая энцыклапедыя : у 5 т. – Мінск, 1981. – Т. 5. – С. 264. Беларуская энцыклапедыя : у 18 т. – Мінск, 1998. – Т. 7. – С. 396. Беларускія пісьменнікі : біябібліяграфічны слоўнік : у 6 т. – Мінск, 1994. – Т. 3. – С. 53. Беларускія пісьменнікі (1917–1990) : даведнік / [складальнік А. К. Гардзіцкі]. – Мінск, 1994. – С. 237. Беларускія пісьменнікі і літаратурны працэс 20-30 гадоў. – Мінск, 1985. – С. 199–221. Бугаёў, Д. Шматграннасць / Д. Бугаёў. – Мінск, 1970. – С. 40–41. Гаўрук, Ю. Ступень адказнасці / Ю. Гаўрук . – Мінск, 1986. – С. 150–152. Гісторыя беларускай літаратуры ХХ стагоддзя : у 4-т. – Мінск,1999. – Т. 2. – С. 646–656. Звязда. – 2007. – 5 верасня. – С. 4. – (дадатак "Местное самоуправление"). Казека, Я. Падарожжа ў маладосць / Казека Я. – Мінск, 1984. – С. 85–103. Ленінскі шлях (Горкі). – 2007. – 12 верасня. – С. 8. Лившиц, В. М. С Горками и академией связаны судьбой : (события, люди и дела). Заметки краеведа : 175-летию БГСХА посвящается / В. М. Лившиц. – Горки, 2013. – С. 118–132. Літаратура і мастацтва. – 1998. – 12 чэрвеня. Ліўшыц, У.М. Сын вёскі / Ліўшыц У. – Орша, 1998. – 46 с. Магілёўская даўніна. – Магілёў, 1998. – С. 59–62. Пальчэўскі, А. Выбраныя творы / А. Пальчэўскі. – Мінск, 1975. – Т. 2. – С. 405–412. Пісьменнікі Савецкай Беларусі. – Мінск, 1981. – С. 151-152. Роднае слова. – 2007. – № 8. – С. 19. Скрыган, Я. Некалькі хвілін чужога жыцця / Скрыган Я. – Мінск, 1979. – С. 108–114. Энцыклапедыя гісторыі Беларусі : у 6 т. – Мінск, 1996. – Т. 3. – С. 519. Энцыклапедыя літаратуры і мастацтва Беларусі : у 5 т. – Мінск, 1985. – Т. 2. – С. 604.